स्तोत्र
श्री राघवेन्द्र वैभव स्तोत्रम्
परिचय
श्री राघवेन्द्र वैभव स्तोत्रम् को स्तोत्र के रूप में प्रस्तुत किया गया है, जो स्तुति का एक भक्ति-पाठ है। यह मौलिक मार्गदर्शिका इसके विषय को समझने और परंपरा का सम्मान करते हुए आगे बढ़ने का स्थान देती है।
पाठ
बृन्दावनस्थ वर बृन्दारकेन्द्र शुभबृन्दैकदान निपुण
बृन्दावनार्चक सुबृन्दाविहारिरत बृन्दारकांशयुत भो ।
बृन्दारकैक रत बृन्दारकाप्त जनवृन्दावनैक निरत
बृन्दाभ बोध सुख मन्दार वृक्षनिभ वन्दामहे तव पदम् ॥ १ ॥
मोक्षादिदान सुरवृक्षायमान मम वक्षोरुमण्डलगत
भीक्षूत्तमाशु तव लक्ष्याय मानमभिवीक्षाद्य पालय गुरो ।
प्रक्षीणपाप वरभक्त्यादि सौख्यबलमक्षीण भूतिमनिशं
सुक्षेममायुरपरोक्षामलस्व मम दत्वाशु पालय गुरो ॥ २ ॥
कुष्टादिरोगतति पिष्टीकृतामल सदा बद्ध सान्द्रविभव
व्याघ्राहि दुष्टनृप दुर्जात वृश्चिक मुखानिष्टनाश चतुर ।
निष्ठीवनेन तव कष्टावलिं मम भवाधिं च मोचय गुरो
इष्टार्थदोसि परशिष्टौघपालन समर्थोसिकीर्त्यमहिमन् ॥ ३ ॥
गम्भीरभाव जित सिन्धो सुमौनिवर कान्त्याविनिर्जितरवे
अम्भोज जाप्तपद सम्भावनाप्तवर जम्भारिसत्पद गुरो ।
दम्भादि दोषहर जृम्भीकृतात्मवर बिम्बाङ्घ्रिकञ्ज भजक
अम्बापितासि मम बिम्बो भवान् खलु सुडिम्बोस्मि ते सुरवर ॥ ४ ॥
तीर्थी कृतात्म सुखतीर्थोरु शास्त्रमुख तीर्थाब्धिमग्न हृदय
तीर्थादनिष्टहर तीर्थाप्तमोक्षसुख तीर्थस्वरूप महित ।
तीर्थोरुभासित सुतीर्थात्मभाव परतीर्थालिनाश चतुर
तीर्थामरालिवर तीर्थाङ्घ्रि भक्तियुत भो पाहि मां गुरुवर ॥ ५ ॥
कञ्जाक्षहारधर कञ्जाभकण्ठयुत कञ्जोपमाननयन
कञ्जाप्त दीप्तितनु कञ्जारिवद्वदन कञ्जाङ्घ्रिद्वन्द्व शुभद ।
कञ्जोद्भवादि सुर कुञ्जाधिवेशित हृदम्भोज रञ्जित मते
कुञ्जालयस्थवर सञ्जीवनाद्रिधर कञ्जोपमाङ्घ्रि भजक ॥ ६ ॥
नक्षत्ररूपधर नक्षत्रहारयुत नक्षत्रपालवरद
नक्षत्रलोल पर नक्षत्रधारि सख नक्षत्रदान निपुण ।
नक्षत्रवन्द्यवर नक्षत्रपाशहर नक्षत्रवाहन गुरो
नक्षत्रनन्दकर नक्षत्रसाल मम नक्षत्र माशु दिश भो ॥ ७ ॥
मातङ्ग पादरत मातङ्ग रत्नधर मातङ्ग गर्वहरण
मातङ्ग पोतवर मातङ्ग वंशवर मातङ्ग शौर्यनिरहा ।
मातङ्ग दूतमत मातङ्ग पालक सुमातङ्ग सेव्य परम
मातङ्ग सङ्घयुत मातङ्गवाहन सदानन्द पालय गुरो ॥ ८ ॥
मन्त्रात्मकायवर मन्त्रालि जापक सुमन्त्रोरुभासित मते
मन्त्रार्थबोधक सुमन्त्रैकसिद्ध शुभ मन्त्राधिदेव करुणी ।
मन्त्रात्मभाव परमन्त्रौघनाशक सुमन्त्रार्थसाधक गुरो
मन्त्रज्ञपालय सुमन्त्रालयस्थ यति राजाधिराज कृपया ॥ ९ ॥
सिन्धूरतेजयुत सिन्धूरपालवर सिन्धूरदायक गुरो
सिन्धूरसङ्घगत सिन्धूरसारमय सिन्धूरपावनतर ।
सिन्धूरगह्वरग व्यासाभिधानवर सिन्धूरपापहरण
सिन्धूरपालसख सिन्धूरहारि मम सन्देहि सौख्यमतुलम् ॥ १० ॥
तुङ्गातरङ्गयुत शृङ्गारतीरगत योगीन्द्रवन्द्यचरण
पादाम्बुसेवन सदासक्त दासजन पङ्ग्वादि दोषहरण ।
श्रीरङ्गपादकृतरङ्गाभियुक्त वर तुङ्गायमान महिम
रङ्गाङ्घ्रिसक्तमन रङ्गार्चने निरत मां पाहि भो गुरुवर ॥ ११ ॥
गान्धारवंशवर गान्धारपादगत गाङ्गायमान वरद
गान्धारपाद कमलाराधनाप्तवर गान्धारदेव करुणी ।
गान्धारगानकर गान्धारभक्तवर गान्धारदायक विभो
गान्धारमन्त्ररत गान्धारकीर्तिधर भो पाहि मां गुरुवर ॥ १२ ॥
संवत्सराढ्य खलु संवत्सरानन सुसंवत्सरेणयुत भो
संवत्सरात्मजित संवत्सर प्रभव हे सम्यमीन्द्र परम ।
संवत्सराप्तपद संवत्सराहरण संसेविपालन पटो
संवत्सरार्पित सुसत्कर्म सङ्घयुत शश्वत् सुखं दिश गुरो ॥ १३ ॥
गोपालपूज्यपद गोपालनाथवर गोपालसेवनपर
गोपालवेद्यनुत गोपालभावयुत गोपालबालरत भो ।
गोपालपोतपद पाथोजयुग्मगत चित्ताभिरम्य चरित
गोपालगीतिरत पापालिनाशकर मां पालयाद्य करुणी ॥ १४ ॥
श्रीराघवेन्द्र गुरुपादाम्बुज द्वितय सौगन्ध्य सार मधुपः
स्वामी बुधालि गुरुराजायमान गुरुपादाब्ज भक्तिभरितः ।
पारायणार्थमखिलाराधनार्ह गुरुराजस्य वैभवयुतं
सौभाग्य सौख्य धनधान्यादि वर्धकमिदं स्तोत्रमाविरकरोत् ॥ १५ ॥
इति श्रीगुरुजगन्नाथदासार्यकृत श्री राघवेन्द्र वैभव स्तोत्रम् ॥