स्तोत्र

श्री राघवेन्द्र आपादमौलिपर्यन्तवर्णन स्तोत्रम्

परिचय

श्री राघवेन्द्र आपादमौलिपर्यन्तवर्णन स्तोत्रम् को स्तोत्र के रूप में प्रस्तुत किया गया है, जो स्तुति का एक भक्ति-पाठ है। यह मौलिक मार्गदर्शिका इसके विषय को समझने और परंपरा का सम्मान करते हुए आगे बढ़ने का स्थान देती है।

पाठ

तन्नमामि मुनिवृन्दवन्दितं

मन्दहास मुख सुन्दर द्युतिम् ।

कुन्द कोकनद कान्ति बन्धुरं

वन्दितामर सुभूज सन्निभम् ॥ १ ॥

कञ्जलोचन सुफाल नासिकं

मञ्जुलोक्ति जनरञ्जकं सदा ।

सूर्यपुञ्ज समकान्ति सम्युतं

कम्बुतुल्य शुभकण्ठ रञ्जितम् ॥ २ ॥

वारिजाक्ष मणिहार कन्धरं

चारु दिव्य तुलसी विभूषितम् ।

सार फुल्लसुमनोभि शोभितं

सीरजाधव सुपाद मानसम् ॥ ३ ॥

पीन गौर परिवृत्त कन्धरं

दान शोभित करं सुवर्चसम् ।

श्रीनिवास कृतवास मानसं

ज्ञानमूर्तिमनिशं भजाम्यहम् ॥ ४ ॥

बिम्बमूर्ति पद चिन्तनोद्यतं

शम्बरारि सुरवृन्द सेवितम् ।

नारसिंह पदपद्म सेविनं

रामगामिनमुपाश्रये गुरुम् ॥ ५ ॥

सुन्दरोदर विलासि रेखकं

सिन्धुराज परिवर्त नाभिकम् ।

बृन्दवालुक नितम्ब शोभितं

तुन्दिदेश कटिभाग रञ्जितम् ॥ ६ ॥

मूलराम शुभविग्रहार्चकं

मानवालि सुखदायकं सदा ।

सानुराग मतिदान दीक्षितं

दान सञ्जित सुरद्रुमं भजे ॥ ७ ॥

ऊरुयुग्म विनिवर्ति रम्भकं

शुद्धजानु ललितं सुजङ्घिनम् ।

कम्बु कन्द सुसमान गुल्फकं

अम्बुजोपम सुपाद युग्मकम् ॥ ८ ॥

शारदेन्दु सुकला नखत्विषं

चारु सञ्चरण वश्य सज्जनम् ।

धीरराज गुरुराज पुङ्गवं

संश्रये मम हि जीवितेश्वरम् ॥ ९ ॥

स्वामिराजमवमां गुरूत्तम

प्रेमपूर्वक दृशा विलोकय ।

त्वां भजामि शरणं दयानिधे

नौमि ते पद सरोज मात्रकम् ॥ १० ॥

पाहि पाहि तव पाद सेविनं

देहि मे परममिष्टमञ्जसा ।

मानसं मम निविश्य सद्गुरो

दर्शयस्व तव रूपमक्षयम् ॥ ११ ॥

स्वामिना राघवेन्द्राख्य गुरुपादाब्ज सेविना ।

आपादमौलिपर्यन्त स्तोत्रं विरचितं मया ॥ १२ ॥

इति श्रीगुरुजगन्नाथदासार्य विरचितं श्री राघवेन्द्र आपादमौलिपर्यन्तवर्णन स्तोत्रम् ॥