भक्ति पाठ
श्री बगलामुखी कवचम् – १ (रुद्रयामले)
परिचय
यह मौलिक मार्गदर्शिका श्री बगलामुखी कवचम् – १ (रुद्रयामले) और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।
पाठ
विनियोगः –
अस्य श्रीपीताम्बरा बगलामुखी कवचस्य महादेव ऋषिः, उष्णिक् छन्दः, श्रीपीताम्बरा देवता, स्थिरमाया बीजं, स्वाहा शक्तिः, अं ठः कीलकं, मम सन्निहितानां दूरस्थानां सर्वदुष्टानां वाङ्मुखपदजिह्वापवर्गाणां स्तम्भनपूर्वकं सर्वसम्पत्तिप्राप्ति चतुर्वर्गफलसाधनार्थे जपे विनियोगः ॥
ध्यानम् –
मध्येसुधाब्धिमणिमण्डपरत्नवेद्यां
सिंहासनोपरिगतां परिपीतवर्णाम् ।
पीताम्बराभरणमाल्यविभूषिताङ्गीं
देवीं भजामि धृतमुद्गरवैरिजिह्वाम् ॥
जिह्वाग्रमादाय करेण देवीं
वामेन शत्रून् परिपीडयन्तीम् ।
गदाभिघातेन च दक्षिणेन
पीताम्बराढ्यां द्विभुजां नमामि ॥
पीठिका –
हिमवत्तनया गौरी कैलासेऽथ शिलोच्चये ।
अपृच्छद्गिरिशं देवी साधकानुग्रहेच्छया ॥ १ ॥
श्रीपार्वत्युवाच ।
देवदेव महादेव भक्तानुग्रहकारक ।
शृणु विज्ञाप्यते यत्तु श्रुत्वा सर्वं निवेदय ॥ २ ॥
विशुद्धाः कौलिका लोके ये मत्कर्मपरायणाः ।
तेषां निन्दाकरा लोके बहवः किल दुर्जनाः ॥ ३ ॥
मनोबाधां विदधते मुहुः कटुभिरुक्तिभिः ।
तेषामाशु विनाशाय त्वया देव प्रकाशितः ॥ ४ ॥
यो मन्त्रो बगलामुख्याः सर्वकामसमृद्धिदः ।
कवचं तस्य मन्त्रस्य प्रकाशय दयानिधे ॥ ५ ॥
यस्य स्मरणमात्रेण पशूनां निग्रहो भवेत् ।
आत्मानं सततं रक्षेद्व्याघ्राग्निरिपुराजतः ॥ ६ ॥
श्रुत्वाऽथ पार्वतीवाक्यं ज्ञात्वा तस्या मनोगतम् ।
विहस्य तां परिष्वज्य साधु साध्वित्यपूजयत् ।
तदाह कवचं देव्यै कृपया करुणानिधिः ॥ ७ ॥
श्रीशङ्कर उवाच ।
शृणु त्वं बगलामुख्याः कवचं सर्वकामदम् ।
यस्य स्मरणमात्रेण बगलामुखी प्रसीदति ॥ ८ ॥
कवचं –
सर्वसिद्धिप्रदा प्राच्यां पातु मां बगलामुखी ।
पीताम्बरा तु चाग्नेय्यां याम्यां महिषमर्दिनी ॥ ९ ॥
नैरृत्यां चण्डिका पातु भक्तानुग्रहकारिणी ।
पातु नित्यं महादेवी प्रतीच्यां शूकरानना ॥ १० ॥
वायव्ये पातु मां काली कौबेर्यां त्रिपुराऽवतु ।
ईशान्यां भैरवी पातु पातु नित्यं सुरप्रिया ॥ ११ ॥
ऊर्ध्वं वागीश्वरी पातु मध्ये मां ललिताऽवतु ।
अधस्तादपि मां पातु वाराही चक्रधारिणी ॥ १२ ॥
मस्तकं पातु मे नित्यं श्रीदेवी बगलामुखी ।
फालं पीताम्बरा पातु नेत्रे त्रिपुरभैरवी ॥ १३ ॥
श्रवणौ विजया पातु नासिकायुगलं जया ।
शारदा वचनं पातु जिह्वां पातु सुरेश्वरी ॥ १४ ॥
कण्ठं रक्षतु रुद्राणी स्कन्धौ मे विन्ध्यवासिनी ।
सुन्दरी पातु बाहू मे जया पातु करौ सदा ॥ १५ ॥
भवानी हृदयं पातु मध्यं मे भुवनेश्वरी ।
नाभिं पातु महामाया कटिं कमललोचना ॥ १६ ॥
ऊरू मे पातु मातङ्गी जानुनी चापराजिता ।
जङ्घे कपालिनी पातु चरणौ चञ्चलेक्षणा ॥ १७ ॥
सर्वतः पातु मां तारा योगिनी पातु चाग्रतः ।
पृष्ठं मे पातु कौमारी दक्षपार्श्वे शिवाऽवतु ॥ १८ ॥
रुद्राणी वामपार्श्वे तु पातु मां सर्वदेष्टदा ।
स्तुता सर्वेषु देवेषु रक्तबीजविनाशिनी ॥ १९ ॥
फलश्रुतिः –
इत्येतत् कवचं दिव्यं धर्मकामार्थसाधनम् ।
गोपनीयं प्रयत्नेन कस्यचिन्न प्रकाशयेत् ॥ २० ॥
यः सकृच्छृणुयादेतत् कवचं मन्मुखोदितम् ।
स सर्वान् लभते कामान् मूर्खो विद्यामवाप्नुयात् ।
तस्याशु शत्रवो यान्ति यमस्य भवने शिवे ॥ २१ ॥
इति श्रीरुद्रयामले महातन्त्रे श्री बगलामुखी कवचम् ।