भक्ति पाठ

एकचत्वारिंश दशकम् (४१) – प्रणामम्

एकचत्वारिंश दशकम् (४१) – प्रणामम्

परिचय

यह मौलिक मार्गदर्शिका एकचत्वारिंश दशकम् (४१) – प्रणामम् और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।

पाठ

देवि त्वदावास्यमिदं न किञ्चि-

-द्वस्तु त्वदन्यद्बहुधेव भासि ।

विश्वात्मिके ते सततं नमोऽस्तु ॥ ४१-१ ॥

न जन्म ते कर्म च देवि लोक-

-क्षेमाय जन्मानि दधासि मातः ।

करोषि कर्माणि च निस्पृहा त्वं

जगद्विधात्र्यै सततं नमस्ते ॥ ४१-२ ॥

तत्त्वत्पदं यद्ध्रुवमारुरुक्षुः

पुमान् व्रती निश्चलदेहचित्तः ।

करोति तीव्राणि तपांसि योगी

तस्यै नमस्ते जगदम्बिकायै ॥ ४१-३ ॥

त्वदाज्ञया वात्यनिलोऽनलश्च

ज्वलत्युदेति द्युमणिः शशी च ।

निजैर्निजैः कर्मभिरेव सर्वे

त्वां पूजयन्ते वरदे नमस्ते ॥ ४१-४ ॥

भक्तिर्न वन्ध्या यत एव देवि

रागादिरोगाभिभवाद्विमुक्ताः ।

मर्त्यादयस्त्वत्पदमाप्नुवन्ति

तस्यै नमस्ते भुवनेशि मातः ॥ ४१-५ ॥

सर्वात्मना यो भजते त्वदङ्घ्रिं

माया तवामुष्य सुखं ददाति ।

दुःखं च सा त्वद्विमुखस्य देवि

मायाधिनाथे सततं नमस्ते ॥ ४१-६ ॥

दुःखं न दुःखं न सुखं सुखं च

त्वद्विस्मृतिर्दुःखमसह्यभारम् ।

सुखं सदा त्वत्स्मरणं महेशि

लोकाय शं देहि नमो नमस्ते ॥ ४१-७ ॥

पतन्तु ते देवि कृपाकटाक्षाः

सर्वत्र भद्राणि भवन्तु नित्यम् ।

सर्वोऽपि मृत्योरमृतत्वमेतु

नश्यन्त्वभद्राणि शिवे नमस्ते ॥ ४१-८ ॥

नमो नमस्तेऽखिलशक्तियुक्ते

नमो नमस्ते जगतां विधात्रि ।

नमो नमस्ते करुणार्द्रचित्ते

नमो नमस्ते सकलार्तिहन्त्रि ॥ ४१-९ ॥

दुर्गे महालक्ष्मि नमो नमस्ते

भद्रे महावाणि नमो नमस्ते ।

कल्याणि मातङ्गि रमे भवानि

सर्वस्वरूपे सततं नमस्ते ॥ ४१-१० ॥

यत्किञ्चिदज्ञातवतेह देवी-

-नारायणीयं रचितं मयेदम् ।

अभद्रनाशाय सतां हिताय

तव प्रसादाय च नित्यमस्तु ॥ ४१-११ ॥