भक्ति पाठ

एकोनचत्वारिंश दशकम् (३९) – मणिद्वीपनिवासिनी

एकोनचत्वारिंश दशकम् (३९) – मणिद्वीपनिवासिनी

परिचय

यह मौलिक मार्गदर्शिका एकोनचत्वारिंश दशकम् (३९) – मणिद्वीपनिवासिनी और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।

पाठ

सुधासमुद्रो जगतां त्रयाणां

छत्रीभवन् मञ्जुतरङ्गफेनः ।

सतारकव्योमसमो विभाति ॥ ३९-१ ॥

तन्मध्यदेशे विमलं मणिद्वी-

-पाख्यां पदं देवि विराजते ते ।

यदुच्यते संसृतिनाशकारि

सर्वोत्तरं पावनपावनं च ॥ ३९-२ ॥

तत्रास्त्ययोधातुमयो मनोज्ञः

सालो महासारमयस्ततश्च ।

एवं च ताम्रादिमयाः किलाष्टा-

-दशातिचित्रा वरणा लसन्ति ॥ ३९-३ ॥

तैरावृतं ते पदमद्वितीयं

विभाति चिन्तामणिसद्म देवि ।

सन्त्यत्र सत्स्तम्भसहस्ररम्य-

-शृङ्गारमुक्त्यादिकमण्डपाश्च ॥ ३९-४ ॥

ब्रह्माण्डकोटीः सुखमावसन्त

उपासकास्ते मनुजाः सुराश्च ।

दैत्याश्च सिद्धाश्च तथेतरे च

यदन्ततो यान्ति पदं तदेतत् ॥ ३९-५ ॥

त्वं मण्डपस्था बहुशक्तियुक्ता

शृणोषि देवीकलगीतकानि ।

ज्ञानं विमुक्तिं च ददासि लोक-

-रक्षामजस्रं कुरुषे च देवि ॥ ३९-६ ॥

मञ्चोऽस्ति चिन्तामणिगेहतस्ते

ब्रह्मा हरी रुद्र इहेश्वरश्च ।

खुरा भवन्त्यस्य सदाशिवस्तु

विराजते सत्फलकत्वमाप्तः ॥ ३९-७ ॥

तस्योपरि श्रीभुवनेश्वरि त्वं

सर्वेश वामाङ्कतले निषण्णा ।

चतुर्भुजा भूषणभूषिताङ्गी

निर्व्याजकारुण्यवती विभासि ॥ ३९-८ ॥

प्रतिक्षणं कारयसि त्वमिच्छा-

-ज्ञानक्रियाशक्तिसमन्विताऽत्र ।

त्रिमूर्तिभिः शक्तिसहस्रयुक्ता

ब्रह्माण्डसर्गस्थितिसंहृतीश्च ॥ ३९-९ ॥

सा त्वं हि वाचां मनसोऽप्यगम्या

विचित्ररूपाऽसि सदाऽप्यरूपा ।

पुरः सतां सन्निहिता कृपार्द्रा

सदा मणिद्वीपनिवासिनी च ॥ ३९-१० ॥

मातर्मदन्तःकरणे निषण्णा

विद्यामयं मां कुरु बन्धमुक्तम् ।

बन्धं च मोक्षं च ददास्यसक्ता

दासोऽस्मि ते देवि नमो नमस्ते ॥ ३९-११ ॥

चत्वारिंश दशकम् (४०) – प्रार्थना >>