भक्ति पाठ

पञ्चत्रिंश दशकम् (३५) – अनुग्रहवैचित्र्यम्

पञ्चत्रिंश दशकम् (३५) – अनुग्रहवैचित्र्यम्

परिचय

यह मौलिक मार्गदर्शिका पञ्चत्रिंश दशकम् (३५) – अनुग्रहवैचित्र्यम् और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।

पाठ

भाग्योदये त्रीणि भवन्ति नूनं

मनुष्यता सज्जनसङ्गमश्च ।

त्वदीयमाहात्म्यकथाश्रुतिश्च

यतः पुमांस्त्वत्पदभक्तिमेति ॥ ३५-१ ॥

ततः प्रसीदस्यखिलार्थकामान्

भक्तस्य यच्छस्यभयं च मातः ।

क्षमां कृतागस्सु करोषि चार्यो-

-रन्योन्यवैरं शमयस्यनीहा ॥ ३५-२ ॥

दुष्कीर्तिभीत्या पृथया कुमार्या

त्यक्तं तटिन्यां सुतमर्कलब्धम् ।

सम्प्रार्थिता त्वं परिपालयन्ती

प्रादर्शयः स्वं करुणाप्रवाहम् ॥ ३५-३ ॥

सुतान् कुरुक्षेत्ररणे हतान् स्वान्

दिदृक्षवे मातृगणाय कृष्णः ।

सम्प्रार्थितस्त्वत्करुणाभिषिक्तः

प्रदर्श्य सर्वान् समतोषयच्च ॥ ३५-४ ॥

वणिक् सुशीलः खलु नष्टवित्तो

व्रतं चरन् प्राङ्नवरात्रमार्यः ।

त्वां देवि सम्पूज्य दरिद्रभावा-

-न्मुक्तः क्रमाद्वित्तसमृद्धिमाप ॥ ३५-५ ॥

देवद्रुहो देवि रणे त्वयैव

दैत्या हता गर्हितधर्मशास्त्राः ।

प्रह्लादमुख्यानसुरान् स्वभक्तान्

देवांश्च सन्त्यक्तरणानकार्षीः ॥ ३५-६ ॥

पुरन्दरे पापतिरोहिते त-

-त्स्थानाधिरूढान्नहुषात्स्मरार्तात् ।

भीता शची त्वां परिपूज्य दृष्ट्वा

पतिं क्रमाद्भीतिविमुक्तिमाप ॥ ३५-७ ॥

शप्तो वसिष्ठेन निमिर्विदेहो

भूत्वाऽपि देवि त्वदनुग्रहेण ।

ज्ञानं परं प्राप निमेः प्रयोगा-

-न्निमेषिणो जीवगणा भवन्ति ॥ ३५-८ ॥

हा भार्गवा लोभविकोपचित्तैः

प्रपीडिता हैहयवंशजातैः ।

हिमाद्रिमाप्ता भवतीं प्रपूज्य

प्रसाद्य भीतेः खलु मुक्तिमापुः ॥ ३५-९ ॥

दस्रौ युवानां च्यवनं पतिं च

समानरूपानभिदृश्य मुग्धा ।

सती सुकन्या तव संस्मृताया

भक्त्या प्रसादात्स्वपतिं व्याजानात् ॥ ३५-१० ॥

सत्यव्रतो विप्रवधूं प्रसह्य

हर्ता निरस्तो जनकेन राज्यात् ।

वसिष्ठशप्तोऽपि तव प्रसादा-

-द्राज्येऽभिषिक्तोऽथ दिवं गतश्च ॥ ३५-११ ॥

हा हा हरिश्चन्द्रनृपो विपत्सु

मग्नः शताक्षीं परदेवतां त्वाम् ।

संस्मृत्य सद्यः स्वविपन्निवृत्तः

कारुण्यतस्ते सुरलोकमाप ॥ ३५-१२ ॥

अगस्त्यपूजां परिगृह्य देवि

विभासि विन्ध्याद्रिनिवासिनी त्वम् ।

द्रक्ष्ये कदा त्वां मम देहि भक्तिं

कारुण्यमूर्ते सततं नमस्ते ॥ ३५-१३ ॥

षट्त्रिंश दशकम् (३६) – मूलप्रकृतिमहिमा >>