भक्ति पाठ

एकत्रिंश दशकम् (३१) – भ्रामर्यवतारम्

एकत्रिंश दशकम् (३१) – भ्रामर्यवतारम्

परिचय

यह मौलिक मार्गदर्शिका एकत्रिंश दशकम् (३१) – भ्रामर्यवतारम् और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।

पाठ

कश्चित्पुरा मन्त्रमुदीर्य गाय-

-त्रीति प्रसिद्धं दितिजोऽरुणाख्यः ।

चिराय कृत्वा तप आत्मयोनेः

प्रसादितादाप वरानपूर्वान् ॥ ३१-१ ॥

स्त्रीपुम्भिरस्त्रैश्च रणे द्विपादै-

-श्चतुष्पदैश्चाप्युभयात्मकैश्च ।

अवध्यतां देवपराजयं च

लब्ध्वा स दृप्तो दिवमाससाद ॥ ३१-२ ॥

रणे जिता दैत्यभयेन लोक-

-पालैः सह स्वस्वपदानि हित्वा ।

देवा द्रुताः प्राप्य शिवं रिपूणां

सम्यग्वधोपायमचिन्तयंश्च ॥ ३१-३ ॥

तदाऽभवत्काप्यशरीरिणी वा-

-ग्भजेत देवीं शुभमेव वः स्यात् ।

दैत्योऽरुणो वर्धयतीह गाय-

-त्र्युपासनेनात्मबलं त्वधृष्यम् ॥ ३१-४ ॥

यद्येष तं मन्त्रजपं जहाति

स दुर्बलः साध्यवधोऽपि च स्यात् ।

एवं निशम्य त्रिदशैः प्रहृष्टै-

-रभ्यर्थितो देवगुरुः प्रतस्थे ॥ ३१-५ ॥

स प्राप दैत्यं यतिरूपधारी

प्रत्युद्गतो मन्त्रजपातिसक्तम् ।

स्मितार्द्रमूचे कुशली सबन्धु-

-मित्रो भवान् किं जगदेकवीर ॥ ३१-६ ॥

दैत्यस्य ते मन्त्रजपेन किं यो

नूनं बलिष्ठं त्वबलं करोति ।

येनैव देवा अबला रणेषु

त्वया जितास्त्वं स्वहितं कुरुष्व ॥ ३१-७ ॥

संन्यासिनो मन्त्रजपेन राग-

-द्वेषादि जेतुं सततं यतन्ते ।

न त्वं यतिर्नापि मुमुक्षुरर्थ-

-कामातिसक्तस्य जपेन किं ते ॥ ३१-८ ॥

एकं हि मन्त्रं समुपास्वहे द्वौ

तेनासि मित्रं मम तद्वदामि ।

मन्त्रश्च मे मुक्तिद एव तुभ्यं

वृद्धिं न दद्यादयमित्यवेहि ॥ ३१-९ ॥

बृहस्पतावेवमुदीर्य याते

सत्यं तदुक्तं दितिजो विचिन्त्य ।

क्रमाज्जहौ मन्त्रजपं सदा हि

मूढः परप्रोक्तविनेयबुद्धिः ॥ ३१-१० ॥

एवं गुरौ कुर्वति दैत्यभीतैः

कृत्वा तपोयोगजपाध्वरादि ।

जाम्बूनदेश्वर्यमरैः स्तुता त्वं

प्रसादिता प्रादुरभूः कृपार्द्रा ॥ ३१-११ ॥

त्वद्देहजातैर्भ्रमरैरनन्तै-

-र्दैत्यः ससैन्यो विफलास्त्रशस्त्रः ।

दष्टो हतस्त्वं च नुतिप्रसन्ना

पश्यत्सु देवेषु तिरोहिताऽभूः ॥ ३१-१२ ॥

स्वदेहतो वै भ्रमरान् विधात्री

त्वं भ्रामरीति प्रथिता जगत्सु ।

अहो विचित्रास्तव देवि लीलाः

नमो नमस्ते भुवनेशि मातः ॥ ३१-१३ ॥

द्वात्रिंश दशकम् (३२) – यक्ष कथा >>