भक्ति पाठ

पञ्चदश दशकम् (१५) – सुदर्शनकथा-देवीदर्शनम्

पञ्चदश दशकम् (१५) – सुदर्शनकथा-देवीदर्शनम्

परिचय

यह मौलिक मार्गदर्शिका पञ्चदश दशकम् (१५) – सुदर्शनकथा-देवीदर्शनम् और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।

पाठ

एवं तवैव कृपया मुनिवर्यशीत-

-च्छायाश्रितो हतभयः स सुदर्शनोऽयम् ।

वेदध्वनिश्रवणपूतहृदाश्रमान्ते

सम्मोदयन् मुनिजनान् ववृधे कुमारः ॥ १५-१ ॥

आबाल्यमेष मुनिबालकसङ्गमेन

क्लीं क्लीमितीश्वरि सदा तव बीजमन्त्रम् ।

तत्रोच्चचार कृपयाऽस्य पुरः कदाचि-

-दाविर्बभूविथ नतं तमभाषथाश्च ॥ १५-२ ॥

प्रीताऽस्मि ते सुत जगज्जननीमवेहि

मां सर्वकामवरदां तव भद्रमस्तु ।

चन्द्राननां शशिकलां विमलां सुबाहोः

काशीश्वरस्य तनयां विधिनोद्वह त्वम् ॥ १५-३ ॥

नष्टा भवेयुरचिरेण तवारिवर्गा

राज्यं च यैरपहृतं पुनरेष्यसि त्वम् ।

मातृद्वयेन सचिवैश्च समं स्वधर्मान्

कुर्याः सदेति समुदीर्य तिरोदधाथ ॥ १५-४ ॥

स्वप्ने त्वया शशिकला कथिताऽस्ति भार-

-द्वाजाश्रमे प्रथितकोसलवंशजातः ।

धीमान् सुदर्शन इति ध्रुवसन्धिपुत्र

एनं पतिं वृणु तवास्तु शुभं सदेति ॥ १५-५ ॥

स्वप्नानुभूतमनृतं किमृतं न वेति

सुप्तोत्थिता तु मतिमत्यपि न व्यजानात् ।

पृष्टात्सुदर्शनकथां सुमुखी द्विजात्सा

श्रुत्वाऽनुरक्तहृदयैव बभूव देवि ॥ १५-६ ॥

ज्ञात्वा सुबाहुरिदमाकुलमानसस्ता-

-मस्मान्निवर्तयितुमाशु सहेष्टपत्न्या ।

कृत्वा प्रयत्नमखिलं विफलं च पश्य-

-न्निच्छास्वयंवरविधिं हितमेव मेने ॥ १५-७ ॥

कश्चित्कदाचन सुदर्शनमेत्य विप्रः

प्राहागतः शशिकलावचसाऽहमत्र ।

सा त्वां ब्रवीति नृपपुत्र जगज्जनन्या

वाचा वृतोऽसि पतिरस्मि तवैव दासी ॥ १५-८ ॥

अत्राऽऽगता नृपतयो बहवस्त्वमेत्य

तेषां सुधीर मिषतां नय मां प्रियां ते ।

एवं वधूवचनमानय तां सुशीलां

भद्रं तवास्त्विदमुदीर्य जगाम विप्रः ॥ १५-९ ॥

स्वप्ने च जाग्रति च पश्यति भक्तवर्य-

-स्त्वां सन्ततं तव वचो मधुरं शृणोति ।

ऐश्वर्यमाशु लभतेऽपि च मुक्तिमेति

त्वद्भक्तिमेव मम देहि नमो जनन्यै ॥ १५-१० ॥

षोडश दशकम् (१६) – सुदर्शनविवाहम् >>