भक्ति पाठ

एकादश दशकम् (११) – ब्रह्मनारद संवादम्

एकादश दशकम् (११) – ब्रह्मनारद संवादम्

परिचय

यह मौलिक मार्गदर्शिका एकादश दशकम् (११) – ब्रह्मनारद संवादम् और उसके नाम में आए ज्योतिषीय भाषा का परिचय देती है। यह शैक्षिक समीक्षा है, कोई व्यक्तिगत पाठ या भविष्यवाणी नहीं।

पाठ

श्रीनारदः पद्मजमेकदाऽऽह

पितस्त्वया सृष्टमिदं जगत्किम् ।

किं विष्णुना वा गिरिशेन वा कि-

-मकर्तृकं वा सकलेश्वरः कः ॥ ११-१ ॥

इतीरितोऽजः सुतमाह साधु

पृष्टं त्वया नारद मां शृणु त्वम् ।

विभाति देवी खलु सर्वशक्ति-

-स्वरूपिणी सा भुवनस्य हेतुः ॥ ११-२ ॥

एकं परं ब्रह्म सदद्वितीय-

-मात्मेति वेदान्तवचोभिरुक्ता ।

न सा पुमान् स्त्री च न निर्गुणा सा

स्त्रीत्वं च पुंस्त्वं च गुणैर्दधाति ॥ ११-३ ॥

सर्वं तदा वास्यमिदं जगत्सा

जाता न सर्वं तत एव जातम् ।

तत्रैव सर्वं च भवेत्प्रलीनं

सैवाखिलं नास्ति च किञ्चनान्यत् ॥ ११-४ ॥

गौणानि चान्तःकरणेन्द्रियाणि

सा निर्गुणाऽवाङ्मतिगोचरा च ।

सा स्तोत्रमन्त्रैः सगुणा महद्भिः

संस्तूयते भक्तविपन्निहन्त्री ॥ ११-५ ॥

सुधासमुद्रे वसतीयमार्या

द्वीपे विचित्राद्भुतशक्तियुक्ता ।

सर्वं जगद्यद्वशगं वयं च

त्रिमूर्तयो नाम यदाश्रिताः स्मः ॥ ११-६ ॥

तद्दत्तशक्तित्रयमात्रभाज-

-स्त्रिमूर्तयः पुत्र वयं विनीताः ।

तदाज्ञया साधु सदाऽपि कुर्मो

ब्रह्माण्डसर्गस्थितिसंहृतीश्च ॥ ११-७ ॥

दैवेन मूढं कविमातनोति

सा दुर्बलं तु प्रबलं करोति ।

पङ्गुं गिरिं लङ्घयते च मूकं

कृपावती चाऽतनुते सुवाचम् ॥ ११-८ ॥

यत्किञ्चिदज्ञायि मया महत्त्वं

देव्यास्तदुक्तं तव सङ्ग्रहेण ।

सर्वत्र तद्वर्णय विस्तरेण

विधत्स्व भक्तिं हृदये जनानाम् ॥ ११-९ ॥

इतीरितोऽजेन मुनिः प्रसन्न-

-स्तव प्रभावं करुणार्द्रचित्ते ।

व्यासं तथाऽन्यांश्च यथोचितं स

प्रबोधयामस पवित्रवाग्भिः ॥ ११-१० ॥

न मे गुरुस्त्वच्चरितस्य वक्ता

न मे मतिस्त्वत्स्मरणैकसक्ता ।

नमामि मातश्चरणाम्बुजं ते ॥ ११-११ ॥

द्वादश दशकम् (१२) – उतथ्य जननम् >>