Stotra

Sri Surya Stotram 2 (Deva Krutham)

Sri Surya Stotram 2 (Deva Krutham)

About

Sri Surya Stotram 2 (Deva Krutham) is introduced as a stotra, a devotional hymn of praise. This original guide offers a place to explore its subject and approach the tradition with care.

Hymn text

देवा ऊचुः ।

नमस्ते ऋक्स्वरूपाय सामरूपाय ते नमः ।

यजुः स्वरूपरूपाय साम्नां धामवते नमः ॥ १ ॥

ज्ञानैकधामभूताय निर्धूततमसे नमः ।

शुद्धज्योतिः स्वरूपाय विशुद्धायामलात्मने ॥ २ ॥

चक्रिणे शङ्खिने धाम्ने शार्ङ्गिणे पद्मिने नमः ।

वरिष्ठाय वरेण्याय परस्मै परमात्मने ॥ ३ ॥

नमोऽखिलजगद्व्यापिस्वरूपायात्ममूर्तये ।

सर्वकारणभूताय निष्ठायै ज्ञानचेतसाम् ॥ ४ ॥

नमः सूर्यस्वरूपाय प्रकाशात्मस्वरूपिणे ।

भास्कराय नमस्तुभ्यं तथा दिनकृते नमः ॥ ५ ॥

शर्वरीहेतवे चैव सन्ध्याज्योत्स्नाकृते नमः ।

त्वं सर्वमेतद्भगवन् जगदुद्भ्रमता त्वया ॥ ६ ॥

भ्रमत्या विद्धमखिलं ब्रह्माण्डं सचराचरम् ।

त्वदंशुभिरिदं स्पृष्टं सर्वं सञ्जायते शुचिः ॥ ७ ॥

क्रियते त्वत्करैः स्पर्शाज्जलादीनां पवित्रता ।

होमदानादिको धर्मो नोपकाराय जायते ॥ ८ ॥

तावद्यावन्न सम्योगि जगदेतत् त्वदंशुभिः ।

ऋचस्ते सकला ह्येता यजूंष्येतानि चान्यतः ॥ ९ ॥

सकलानि च सामानि निपतन्ति त्वदङ्गतः ।

ऋङ्मयस्त्वं जगन्नाथ त्वमेव च यजुर्मयः ॥ १० ॥

यतः साममयश्चैव ततो नाथ त्रयीमयः ।

त्वमेव ब्रह्मणो रूपं परं चापरमेव च ॥ ११ ॥

मूर्तामूर्तस्तथा सूक्ष्मः स्थूलरूपस्तथा स्थितः ।

निमेषकाष्ठादिमयः कालरूपः क्षयात्मकः ।

प्रसीद स्वेच्छया रूपं स्वतेजः शमनं कुरु ॥ १२ ॥

इदं स्तोत्रवरं रम्यं श्रोतव्यं श्रद्धया नरैः ।

शिष्यो भूत्वा समाधिस्थो दत्त्वा देयं गुरोरपि ॥ १३ ॥

इति श्रीमार्कण्डेयपुराणे पञ्चसप्ततितमोऽध्याये देव कृत श्री सूर्य स्तोत्रम् ।