Devotional reading

Sri Saraswati Kavacham (Brahma Vaivarta Purana)

Sri Saraswati Kavacham (Brahma Vaivarta Purana)

About

This original guide introduces Sri Saraswati Kavacham (Brahma Vaivarta Purana) and the astrological language named in its title. It is an educational overview, not a personal reading or prediction.

Hymn text

भृगुरुवाच ।

ब्रह्मन् ब्रह्मविदां श्रेष्ठ ब्रह्मज्ञानविशारद ।

सर्वज्ञ सर्वजनक सर्वपूजकपूजित ॥ १ ॥

सरस्वत्याश्च कवचं ब्रूहि विश्वजयं प्रभो ।

अयातयाममन्त्राणां समूहो यत्र सम्युतः ॥ २ ॥

ब्रह्मोवाच ।

शृणु वत्स प्रवक्ष्यामि कवचं सर्वकामदम् ।

श्रुतिसारं श्रुतिसुखं श्रुत्युक्तं श्रुतिपूजितम् ॥ ३ ॥

उक्तं कृष्णेन गोलोके मह्यं वृन्दावने वने ।

रासेश्वरेण विभुना रासे वै रासमण्डले ॥ ४ ॥

अतीव गोपनीयं च कल्पवृक्षसमं परम् ।

अश्रुताद्भुतमन्त्राणां समूहैश्च समन्वितम् ॥ ५ ॥

यद्धृत्वा पठनाद्ब्रह्मन् बुद्धिमांश्च बृहस्पतिः ।

यद्धृत्वा भगवाञ्छुक्रः सर्वदैत्येषु पूजितः ॥ ६ ॥

पठनाद्धारणाद्वाग्मी कवीन्द्रो वाल्मिको मुनिः ।

स्वायम्भुवो मनुश्चैव यद्धृत्वा सर्वपूजितः ॥ ७ ॥

कणादो गौतमः कण्वः पाणिनिः शाकटायनः ।

ग्रन्थं चकार यद्धृत्वा दक्षः कात्यायनः स्वयम् ॥ ८ ॥

धृत्वा वेदविभागं च पुराणान्यखिलानि च ।

चकार लीलामात्रेण कृष्णद्वैपायनः स्वयम् ॥ ९ ॥

शातातपश्च संवर्तो वशिष्ठश्च पराशरः ।

यद्धृत्वा पठनाद्ग्रन्थं याज्ञवल्क्यश्चकार सः ॥ १० ॥

ऋष्यशृङ्गो भरद्वाजश्चास्तीको देवलस्तथा ।

जैगीषव्योऽथ जाबालिर्यद्धृत्वा सर्वपूजितः ॥ ११ ॥

कवचस्यास्य विप्रेन्द्र ऋषिरेष प्रजापतिः ।

स्वयं बृहस्पतिश्छन्दो देवो रासेश्वरः प्रभुः ॥ १२ ॥

सर्वतत्त्वपरिज्ञाने सर्वार्थेऽपि च साधने ।

कवितासु च सर्वासु विनियोगः प्रकीर्तितः ॥ १३ ॥

– कवचं –

ओं ह्रीं सरस्वत्यै स्वाहा शिरो मे पातु सर्वतः ।

श्रीं वाग्देवतायै स्वाहा भालं मे सर्वदाऽवतु ॥ १४ ॥

ओं सरस्वत्यै स्वाहेति श्रोत्रं पातु निरन्तरम् ।

ओं श्रीं ह्रीं भारत्यै स्वाहा नेत्रयुग्मं सदाऽवतु ॥ १५ ॥

ओं ह्रीं वाग्वादिन्यै स्वाहा नासां मे सर्वतोऽवतु ।

ह्रीं विद्याधिष्ठातृदेव्यै स्वाहा श्रोत्रं सदाऽवतु ॥ १६ ॥

ओं श्रीं ह्रीं ब्राह्म्यै स्वाहेति दन्तपङ्क्तीः सदाऽवतु ।

ऐमित्येकाक्षरो मन्त्रो मम कण्ठं सदाऽवतु ॥ १७ ॥

ओं श्रीं ह्रीं पातु मे ग्रीवां स्कन्धं मे श्रीं सदाऽवतु ।

श्रीं विद्याधिष्ठातृदेव्यै स्वाहा वक्षः सदाऽवतु ॥ १८ ॥

ओं ह्रीं विद्यास्वरूपायै स्वाहा मे पातु नाभिकाम् ।

ओं ह्रीं क्लीं वाण्यै स्वाहेति मम पृष्ठं सदाऽवतु ॥ १९ ॥

ओं सर्ववर्णात्मिकायै पादयुग्मं सदाऽवतु ।

ओं वागधिष्ठातृदेव्यै सर्वाङ्गं मे सदाऽवतु ॥ २० ॥

ओं सर्वकण्ठवासिन्यै स्वाहा प्राच्यां सदाऽवतु ।

ओं ह्रीं जिह्वाग्रवासिन्यै स्वाहाऽग्निदिशि रक्षतु ॥ २१ ॥

ओं ऐं ह्रीं श्रीं सरस्वत्यै बुधजनन्यै स्वाहा ।

सततं मन्त्रराजोऽयं दक्षिणे मां सदाऽवतु ॥ २२ ॥

ओं ह्रीं श्रीं त्र्यक्षरो मन्त्रो नैरृत्यां मे सदाऽवतु ।

कविजिह्वाग्रवासिन्यै स्वाहा मां वारुणेऽवतु ॥ २३ ॥

ओं सदम्बिकायै स्वाहा वायव्ये मां सदाऽवतु ।

ओं गद्यपद्यवासिन्यै स्वाहा मामुत्तरेऽवतु ॥ २४ ॥

ओं सर्वशास्त्रवासिन्यै स्वाहैशान्यां सदाऽवतु ।

ओं ह्रीं सर्वपूजितायै स्वाहा चोर्ध्वं सदाऽवतु ॥ २५ ॥

ऐं ह्रीं पुस्तकवासिन्यै स्वाहाऽधो मां सदाऽवतु ।

ओं ग्रन्थबीजरूपायै स्वाहा मां सर्वतोऽवतु ॥ २६ ॥

इति ते कथितं विप्र सर्वमन्त्रौघविग्रहम् ।

इदं विश्वजयं नाम कवचं ब्रह्मरूपकम् ॥ २७ ॥

पुरा श्रुतं धर्मवक्त्रात् पर्वते गन्धमादने ।

तव स्नेहान्मयाऽऽख्यातं प्रवक्तव्यं न कस्यचित् ॥ २८ ॥

गुरुमभ्यर्च्य विधिवद्वस्त्रालङ्कारचन्दनैः ।

प्रणम्य दण्डवद्भूमौ कवचं धारयेत्सुधीः ॥ २९ ॥

पञ्चलक्षजपेनैव सिद्धं तु कवचं भवेत् ।

यदि स्यात् सिद्धकवचो बृहस्पति समो भवेत् ॥ ३० ॥

महावाग्मी कवीन्द्रश्च त्रैलोक्यविजयी भवेत् ।

शक्नोति सर्वं जेतुं स कवचस्य प्रभावतः ॥ ३१ ॥

इदं ते काण्वशाखोक्तं कथितं कवचं मुने ।

स्तोत्रं पूजाविधानं च ध्यानम् वै वन्दनं तथा ॥ ३२ ॥

इति श्रीब्रह्मवैवर्ते महापुराणे प्रकृतिखण्डे नारदनारायणसंवादे चतुर्थोऽध्याये श्री सरस्वती कवचम् ॥