Stotra
Sri Saraswathi Stotram (Skandapurane Ambuvichiraja Krutam)
About
Sri Saraswathi Stotram (Skandapurane Ambuvichiraja Krutam) is introduced as a stotra, a devotional hymn of praise. This original guide offers a place to explore its subject and approach the tradition with care.
Hymn text
सदसद्देवि यत्किञ्चिद्बन्धमोक्षात्मकं पदम् ।
तत्सर्वं गुप्तया व्याप्तं त्वया काष्ठं यथाग्निना ॥ १ ॥
सर्वस्य सिद्धिरूपेण त्वं जनस्य हृदि स्थिता ।
वाचारूपेण जिह्वायां ज्योतीरूपेण चक्षुषि ॥ २ ॥
भक्तिग्राह्यासि देवेशि त्वमेका भुवनत्रये ।
शरणागतदीनार्तपरित्राणपरायणे ॥ ३ ॥
त्वं कीर्तिस्त्वं धृतिर्मेधा त्वं भक्तिस्त्वं प्रभा स्मृता ।
त्वं निद्रा त्वं क्षुधा कीर्तिः सर्वभूतनिवासिनी ॥ ४ ॥
तुष्टिः पुष्टिर्वपुः प्रीतिः स्वधा स्वाहा विभावरी ।
रतिः प्रीतिः क्षितिर्गङ्गा सत्यं धर्मो मनस्विनी ॥ ५ ॥
लज्जा शान्तिः स्मृतिर्दक्षा क्षमा गौरी च रोहिणी ।
सिनीवाली कुहू राका देवमाता दितिस्तथा ॥ ६ ॥
ब्रह्माणी विनता लक्ष्मीः कद्रूर्दाक्षायणी शिवा ।
गायत्री चाथ सावित्री कृषिर्वृष्टिः श्रुतिः कला ॥ ७ ॥
बलानाडी तुष्टिकाष्ठा रसना च सरस्वती ।
यत्किञ्चित् त्रिषु लोकेषु बहुत्वाद्यन्न कीर्तितम् ॥ ८ ॥
इङ्गितं नेङ्गितं तच्च तद्रूपं ते सुरेश्वरि ।
गन्धर्वाः किन्नरा देवाः सिद्धविद्याधरोरगाः ॥ ९ ॥
यक्षगुह्यकभूताश्च दैत्या ये च विनायकाः ।
त्वत्प्रसादेन ते सर्वे संसिद्धिं परमां गताः ॥ १० ॥
तथान्येऽपि बहुत्वाद्ये न मया परिकीर्तिताः ।
आराधितास्तु कृच्छ्रेण पूजिताश्च सुविस्तरैः ।
हरन्तु देवताः पापमन्ये त्वं कीर्तिताऽपि च ॥ ११ ॥
इति श्रीस्कान्दे महापुराणे नागरखण्डे षट्चत्वारिंशोऽध्याये अम्बुवीचिराज कृतं श्री सरस्वती स्तोत्रम् ॥