Devotional reading

Sri Raghavendra Hrudayam

About

This original guide introduces Sri Raghavendra Hrudayam and the astrological language named in its title. It is an educational overview, not a personal reading or prediction.

Hymn text

नारायणं महालक्ष्मीं भार्गवं रघुनायकम् ।

कृष्णं व्यासं हनूमन्तं भीमं मध्वं गुरूनपि ॥ १ ॥

व्यासं नत्वाऽवधूतोऽहं वक्ष्यामि हृदयं गुरोः ।

नानाछन्दः सुसर्वार्थदायकं पापनाशकम् ॥ २ ॥

ध्यायामि श्रीराघवेन्द्रार्यरूपं

भूलोकेऽस्मिन् सर्वसौभाग्यहेतुम् ।

भक्तत्राणायैव बद्धादरं मे

चित्ते नित्यं संवसत्विष्टदैवम् ॥ ३ ॥

पुरा प्रह्लादनामाऽभूत् हिरण्यकशिपोः सुतः ।

यदर्थं श्रीमहाविष्णुर्नृकण्ठीरवतां गतः ॥ ४ ॥

संहतः प्रहतश्चेति तस्यास्तां परिचारिणौ ।

त्रेतायां रामसेवार्थं विभीषणतयाऽजनि ॥ ५ ॥

तत्रापि चारौ तौ जातौ सन्धिकश्च प्रसन्धिकः ।

द्वापरेऽपि समं ताभ्यां समाविष्टश्च वायुना ॥ ६ ॥

भूभारक्षपणे विष्णोरङ्गतामाप्तुमेव सः ।

प्रतीपपुत्रतामाप्य बाह्लीकेष्वभवत्पतिः ॥ ७ ॥

कलौ गोपालकृष्णार्चा पूजायै व्यासमस्करी ।

भूत्वा निर्जित्य दुर्वादान् मध्वशास्त्रं प्रकाशयत् ॥ ८ ॥

ब्रह्ममानसपूजायामाविर्भूतां हृदम्बुजात् ।

श्रीरामार्यं च सीतार्चां प्रपूजयिषुरेषकः ॥ ९ ॥

श्रीराघवेन्द्रतीर्थाख्योऽवतीर्य यतिरूपतः ।

विवृत्या मध्वशास्त्रस्य लोकोपकृतिमातनोत् ॥ १० ॥

अप्पण्णाचार्य कृष्णाख्यौ तत्रापि द्विजरूपतः ।

संहतप्रहतौ जातौ शिष्यौ तस्य प्रियौ सदा ॥ ११ ॥

पुनश्च सत्यसन्धाख्यो मठान्तरनिवासिनीम् ।

अनर्चितां च सीतायाः प्रतिमामार्चयद्यतिः ॥ १२ ॥

विष्वक्सेनाहीशपुत्रावताराः षडिमे मताः ।

तस्य श्रीराघवेन्द्रगुरोः काम्यार्थदायिनः ॥ १३ ॥

अप्पण्णाचार्यरचितं स्तोत्रं सर्वेष्टसाधकम् ।

एतद्विना गुरोः पूजा स्तोत्रं चाष्टाक्षरी जपः ॥ १४ ॥

सेवा च व्यर्थतामेति न प्रसादो गुरोर्भवेत् ।

आदौ सकृद्वा तत्पाठादन्यत्सिद्ध्यति शीघ्रतः ॥ १५ ॥

सर्वेष्वपि च शिष्येषु अप्पण्णाचार्य एव सः ।

गुरोरतिप्रियो यस्मात् स्तुतिस्तेन समादृताः ॥ १६ ॥

अप्पण्णाचार्य सम्प्रोक्तं मूलं माला च वर्म च ।

यथायोगं यथाकालं तत्तदुक्तार्थसिद्धिदम् ॥ १७ ॥

श्रीराघवेन्द्रयतिनं ईप्सितार्थप्रदायिनम् ।

उपासते यथा भक्त्या तथा फलमवाप्नुयात् ॥ १८ ॥

सेवया परमहंसानामैहिकाऽमुष्मिकं भवेत् ।

ज्ञानं भक्तिं च वैराग्यं भुक्तिं मुक्तिं च विन्दति ॥ १९ ॥

इत्यादि वाक्यात् परमहंसाधीशमिमं गुरुम् ।

सेवेत सर्वथा मर्त्यः स्वरूपोद्धारकारणम् ।

स्तुवीत बहुभिः स्तोत्रैः प्रार्थयीत यथेप्सितम् ॥ २० ॥

श्रीराघवेन्द्रं श्रितपारिजातं

सीतारघूत्तंसपदाब्जचित्तम् ।

काषायवस्त्रं कमनीयवेषं

काम्यार्थदातारमतीतदोषम् ॥ २१ ॥

जयतु जयतु राजा राजराजादिपूज्यो

जयतु जयतु रम्ये रञ्जितानेकलोकः ।

जयतु जयतु भोगी भक्तभाग्यप्रदाता

जयतु जयतु भूमा भूरि भूरि प्रदाता ॥ २२ ॥

जयतु जयतु बन्धुर्बन्धनच्छेदकारी

जयतु जयतु मित्रं मीलितानेकवैरी ।

जयतु जयतु माता मान्यमान्यो महात्मा

जयतु जयतु तातस्तापहर्ता नितान्तम् ॥ २३ ॥

गुरो तव पदाम्बुजं भवपयोधिनौकायितं

महाजनपरम्पराभजनगोचरं भूतिदम् ।

भजामि भजतां नृणां बहुगदौघविध्वंसकं

सुखप्रदमहर्निशं सुखसुखेन संसिद्धिदम् ॥ २४ ॥

मनो वसतु पादयोर्भवतु मे वचस्ते स्तुतौ

त्वदीक्षणविधौ दृशा भवतु तेऽर्चनायां करौ ।

श्रुती तव गुणश्रुतौ भवतु मस्तकं ते नतौ

प्रदक्षिणविधौ पदे गुरुवराश्रये ते पदे ॥ २५ ॥

वित्ताशया जगति वित्तादि सम्पदतिमत्तानिमानुपचरन्

आत्ताधिरस्म्यहमनुत्तानलुण्ठदपचित्ताविवेकमतिमान् ।

मत्ताङ्गना कठिनवृत्तानुबन्धिकुचदत्तादरश्च तमिमं

श्रीराघवेन्द्र दययाऽऽरादुपैहि मम धीराशु यच्छ सुमतिम् ॥ २६ ॥

तव सेवारतान् कांश्चित् भक्तान् प्रेषय मां प्रति ।

तेषां मनोरथं तात मया पुत्रेण पूरय ॥ २७ ॥

अथवा करुणासिन्धो मयि सन्निहितः सदा ।

पुत्रस्य मम वाक्येन सर्वसर्वेष्टदो भव ॥ २८ ॥

येन केनाप्युपायेन दूने दुर्यशसा भुवि ।

माहात्म्यं मयि विन्यस्य कुरु मां लोकपूजितम् ॥ २९ ॥

युक्तायुक्तमजानानो याचे त्वां बालवद्गुरो ।

दाता त्राता दयालुस्त्वं यथेच्छसि तथा कुरु ॥ ३० ॥

सर्वज्ञाय स्वतन्त्राय भक्तक्लेशविनाशिने ।

उदारचेतसे किं ते वदे मद्भारवाहिने ॥ ३१ ॥

आपादमौलिपर्यन्तं गुरूणामाकृतिं स्मरेत् ।

तेन विघ्नाः प्रणश्यन्ति सिद्ध्यन्ति च मनोरथाः ॥ ३२ ॥

इति श्रीगुरुराजस्य हृदयं तदनुज्ञया ।

कृष्णावधूत कथितं गुरुवाक्यानुसारतः ।

सम्पाद्य सिद्धसङ्कल्पे भक्तिं मुक्तिं च विन्दति ॥ ३३ ॥

पठनाच्छ्रवणाद्वापि गुरुसान्निध्यकारणम् ।

किमत्रबहुना सर्वं गुरुराजप्रसादतः ॥ ३४ ॥

मोदं मे दिशतु गुरुः स राघवेन्द्रो

दीनानां शरणमुदारचित्तवृत्तिः ।

भक्तानां हरिगुरुरूपदर्शकस्त्वं

सुप्रेम्णा मयि मम तात सन्निधेहि ॥ ३५ ॥

इति श्रीकृष्णावधूतपण्डित कृतौ श्रीराघवेन्द्रतन्त्रे श्री राघवेन्द्र हृदयं नाम तृतीयः पटलः ॥