Ashtakam

Sri Raghava Ashtakam

Sri Raghava Ashtakam

About

Sri Raghava Ashtakam is introduced as an ashtakam, a devotional hymn form associated with a focused sequence of verses. The guide offers context without prescribing a single way to recite or interpret it.

Hymn text

राघवं करुणाकरं मुनिसेवितं सुरवन्दितं

जानकीवदनारविन्ददिवाकरं गुणभाजनम् ।

वालिसूनुहितैषिणं हनुमत्प्रियं कमलेक्षणं

यातुधानभयङ्करं प्रणमामि राघवकुञ्जरम् ॥ १ ॥

मैथिलीकुचभूषणामल नीलमौक्तिकमीश्वरं

रावणानुजपालनं रघुपुङ्गवं मम दैवतम् ।

नागरीवनिताननाम्बुजबोधनीयकलेवरं

सूर्यवंशविवर्धनं प्रणमामि राघवकुञ्जरम् ॥ २ ॥

हेमकुण्डलमण्डितामलकण्ठदेशमरिन्दमं

शातकुम्भ मयूरनेत्रविभूषणेन विभूषितम् ।

चारुनूपुरहारकौस्तुभकर्णभूषणभूषितं

भानुवंशविवर्धनं प्रणमामि राघवकुञ्जरम् ॥ ३ ॥

दण्डकाख्यवने रतामरसिद्धयोगिगणाश्रयं

शिष्टपालनतत्परं धृतिशालिपार्थकृतस्तुतिम् ।

कुम्भकर्णभुजाभुजङ्गविकर्तने सुविशारदं

लक्ष्मणानुजवत्सलं प्रणमामि राघवकुञ्जरम् ॥ ४ ॥

केतकीकरवीरजातिसुगन्धिमाल्यसुशोभितं

श्रीधरं मिथिलात्मजाकुचकुङ्कुमारुणवक्षसम् ।

देवदेवमशेषभूतमनोहरं जगतां पतिं

दासभूतभयापहं प्रणमामि राघवकुञ्जरम् ॥ ५ ॥

यागदानसमाधिहोमजपादिकर्मकरैर्द्विजैः

वेदपारगतैरहर्निशमादरेण सुपूजितम् ।

ताटकावधहेतुमङ्गदतातवालिनिषूदनं

पैतृकोदितपालकं प्रणमामि राघवकुञ्जरम् ॥ ६ ॥

लीलया खरदूषणादिनिशाचराशुविनाशनं

रावणान्तकमच्युतं हरियूथकोटिगणाश्रयम् ।

नीरजाननमम्बुजाङ्घ्रियुगं हरिं भुवनाश्रयं

देवकार्यविचक्षणं प्रणमामि राघवकुञ्जरम् ॥ ७ ॥

कौशिकेन सुशिक्षितास्त्रकलापमायतलोचनं

चारुहासमनाथबन्धुमशेषलोकनिवासिनम् ।

वासवादिसुरारिरावणशासनं च पराङ्गतिं

नीलमेघनिभाकृतिं प्रणमामि राघवकुञ्जरम् ॥ ८ ॥

राघवाष्टकमिष्टसिद्धिदमच्युताश्रयसाधकं

मुक्तिभुक्तिफलप्रदं धनधान्यसिद्धिविवर्धनम् ।

रामचन्द्रकृपाकटाक्षदमादरेण सदा जपेत्

रामचन्द्रपदाम्बुजद्वय सन्ततार्पितमानसः ॥ ९ ॥

राम राम नमोऽस्तु ते जय रामभद्र नमोऽस्तु ते

रामचन्द्र नमोऽस्तु ते जय राघवाय नमोऽस्तु ते ।

देवदेव नमोऽस्तु ते जय देवराज नमोऽस्तु ते

वासुदेव नमोऽस्तु ते जय वीरराज नमोऽस्तु ते ॥ १० ॥

इति श्री राघवाष्टकम् ।