Ashtakam

Shuka Ashtakam (Vyasa Putra Ashtakam)

About

Shuka Ashtakam (Vyasa Putra Ashtakam) is introduced as an ashtakam, a devotional hymn form associated with a focused sequence of verses. The guide offers context without prescribing a single way to recite or interpret it.

Hymn text

भेदाभेदौ सपदिगलितौ पुण्यपापे विशीर्णे

मायामोहौ क्षयमधिगतौ नष्टसन्देहवृत्ती ।

शब्दातीतं त्रिगुणरहितं प्राप्य तत्त्वावबोधं

निस्त्रैगुण्ये पथि विचरतां को विधिः को निषेधः ॥ १ ॥

यस्स्वात्मानं सकलवपुषामेकमन्तर्बहिस्थं

दृष्ट्वा पूर्णं खमिव सततं सर्वभाण्डस्थमेकम् ।

नान्यत्कार्यं किमपि च तथा कारणाद्भिन्नरूपं

निस्त्रैगुण्ये पथि विचरतां को विधिः को निषेधः ॥ २ ॥

यद्वन्नद्योऽम्बुधिमधिगतास्सागरत्वं प्रपन्नाः

तद्द्वज्जीवास्समरसगताः चित्स्वरूपं प्रपन्नाः ।

वाचातीते समरसघने सच्चिदानन्दरूपे

निस्त्रैगुण्ये पथि विचरतां को विधिः को निषेधः ॥ ३ ॥

हेम्नः कार्यं हुतवहगतं हेमतामेति तद्वत्

क्षीरं क्षीरे समरसगतं तोयमेवाम्बुमध्ये ।

एवं सर्वं समरसगतं त्वं पदं तत्पदार्थे

निस्त्रैगुण्ये पथि विचरतां को विधिः को निषेधः ॥ ४ ॥

कश्चात्राहं किमपि च भवान् कोऽयमत्र प्रपञ्चः

स्वान्तर्वेद्ये गगनसदृशे पूर्णतत्त्वप्रकाशे ।

आनन्दाख्ये समरसघने बाह्य अन्तर्विलीने

निस्त्रैगुण्ये पथि विचरतां को विधिः को निषेधः ॥ ५ ॥

दृष्ट्वा सर्वं परमममृतं स्वप्रकाशस्वरूपं

बुध्वात्मानं विमलमचलं सच्चिदानन्दरूपम् ।

ब्रह्माधारं सकलजगतां साक्षिणं निर्विशेषं

निस्त्रैगुण्ये पथि विचरतां को विधिः को निषेधः ॥ ६ ॥

कार्याकार्यं किमपि चरतो नैवकर्तृत्वमस्ति

जीवन्मुक्तिस्स्थितिरिह गता दग्धवस्त्रावभासा ।

एवं देहे प्रचलिततया दृश्यमानस्स मुक्तो

निस्त्रैगुण्ये पथि विचरतां को विधिः को निषेधः ॥ ७ ॥

यस्मिन् विश्वं सकलभुवनं सैन्धवं सिन्धुमध्ये

पृथ्व्यम्ब्वग्निश्वसनगगनं जीवभावक्रमेण ।

यद्यल्लीनं तदिदमखिलं सच्चिदानन्दरूपं

निस्त्रैगुण्ये पथि विचरतां को विधिः को निषेधः ॥ ८ ॥

सत्यं सत्यं परमममृतं शान्ति कल्याणहेतुं

मायारण्ये दहनममलं शान्तिनिर्वाणदीपम् ।

तेजोराशिं निगमसदनं व्यासपुत्राष्टकं यः

प्रातःकाले पठति सहसा याति निर्वाणमार्गम् ॥ ९ ॥

इति शुकाष्टकम् ।